Байнанс хэрэглээний суурь мэдлэг

Байнансаар үйлчлүүлэхийн тулд, KYC баталгаажуулсан байх шаардлагатай тул, ЭНД танилцуулсан бүртгэл баталгаажуулах зааврын дагуу гүйцэтгэж, арилжаанд оролцох эрхээ нээлгээрэй. Бүртгэлээ баталгаажуулснаар дараах аргуудыг ашиглаж, арилжаанд оролцох эрх үүснэ. Үүнд:

1. Төлбөрийн болон зээлийн картаар - Шинэ хэрэглэгчдэд хамгийн ойлгомжтой, хялбар арга нь энэ байх болов уу. Зааврыг доор сийрүүллээ.
2. Spot буюу энгийн арилжааны хэтэвчиндээ фиат валют байршуулах - Банкны данснаасаа мөнгөн тэмдэгтийг шилжүүлж, хэтэвчээ цэнэглэх зарчмаар ажиллана. Мөнгө байршуулах зааврыг удахгүй оруулна аа.
3. P2P буюу хэрэглэгч хоорондын арилжаа - Байнанс дээрх бусад хэрэглэгчидтэй, шууд наймаалцана. Шимтгэлгүй гэдэг том давуу талтай ч, харилцагчаа сайтар судлах хэрэгтэй байдаг шүү.

Төлбөрийн болон зээлийн картаар худалдаа хийх заавар

Байнансийн эхлэл/нүүр хуудас дээрх, Buy Crypto буюу крипто худалдаж авах цэсэнд хандаад, Credit/Debit Card дэд цэс дээр дар.

Авах зоос/токен, тушаах фиат валютаа сонгоод захиалгаа шивж оруулаад, Continue буюу үргэлжүүлэх дараарай. Түүний дараа, төлбөр төлөх картаа сонгох/тохируулах цонх нээгдэх ба, хэрэв өмнө нь картаар худалдаа хийж байсан бол Recurring Buy буюу давтан худалдан авалт сонголтоор, өмнө ашиглаж байсан картаа сонгож болно. Уг зааварт, жишээ болгон £100 GBP буюу Английн фунтаар, BTC-ыг худалдаж авч үзүүлэв.

Картаар анх удаа худалдаа хийж байгаа бол, гарч ирэх талбаруудад харгалзах мэдээллийг нь оруулаад л, онлайн худалдаатай яг адил зарчмаар худалдаа хийж болно.

Add New Card буюу шинэ карт нэмэх товчийг дарж, картын мэдээлэл оруулах цонхонд хандах ба, харгалзах талбаруудын тайлбарыг доор нийтэллээ.

1. Name on Card: Карт дээрх хэрэглэгчийн нэр;
2. Card Number: Картын дугаар (4, 4-өөр таслагдсан 4 хэсэг, нийт 16 орон бүхий, товгор дугаар);
3. Expiry Date: Хүчинтэй хугацаа;
4. Security Code (CVV): Картын ар хэсэгт байрлах, гарын үсэг зурах мөрний хойно хэвлэгдсэн 3 оронтой код.

Бүх мэдээллийг алдаагүй, үнэн зөв оруулсны дараа Next буюу үргэлжлүүлэх товч идэвхжих бөгөөд, түүнийг дарснаар төлбөр төлөгчийн хаягийн мэдээллийг оруулах цонх нээгдэнэ. Энд дараах мэдээллүүдийг оруулна.

1. Country: Оршин суугаа улс;
2. Street: Хаяг;
3. City: Хот;
4. Postal Code: Шуудангийн хаяг - Шуудангийн хайрцаггүй байсан ч, Zip буюу бүсийн код болон байр бүрт харгалзах шуудангийн тусгай дугаарыг үүсгэж, бүртгэлжүүлсэн байдаг тул, zipcode.mn вебрүү хандаад, өөрийн хаяг байршлаар хөөн олж, харгалзах кодыг авч болно. Жишээлбэл, 11000 гэсэн zip кодтой, 11000-0037 гэсэн шуудангийн хаягтай байж болно. Өөр бусад зарим веб дээр энэ кодыг хүлээн зөвшөөрөхгүй байх боломжтой ба тэр үед 11000 кодын урд 2-г нэмж, 211000 гэх зэргээр оруулж болдог.

Хаягийн мэдээллийг оруулж дууссаны дараагаар Add Card буюу карт нэмэх товчийг дарж, оруулсан мэдээллүүдээ хянах цонхонд хандана. Заавал тулгаж шалгасны дараа, ялангуяа мөнгөн дүнгүүдээ цэг, таслал, оронгоор нь нягталсны дараа Continue дарж хэвшээрэй. "," нь мянгатын оронг, "." нь бутархай орныг илтгэнэ. Жишээ нь, 1,200.8 гэсэн байвал "мянга хоёр зуу, аравны найм" гэж ойлгоно шүү.

Захиалга баталгаажуулах цонхыг ахин 1 удаа хянаад, цонхны доод хэсэгт байрлах Terms of Use буюу хэрэглэх нөхцөл, Privacy Policy буюу нууцлалын бодлогыг хүлээн зөвшөөрч байгаагаа илтгэх сонголтыг чагтлаад/зөвлөөд, Confirm буюу баталгаажуулах товч дээрх хугацааг дуусахаас өмнө дарж, захиалгаа илгээнэ.

Захиалга амжилттай гүйцэтгэгдсэн даруйд, худалдаж авсан крипто валют тань Fiat and Spot Wallet буюу фиат валют болон энгийн арилжааны хэтэвчинд байрших болно. Бүртгэл үүсгэж, баталгаажуулаад, дээрх зааврын дагуу крипто худалдаж авах нийт ажиллагаа нь, ердийн үед 10 минут л шаардана.

Анхны зорилт байгаагүй байсан ч, хэзээ 1 цагт Та крипто валют арилжаалах үйлдэл гүйцэтгэх нь маргаангүй зүйл юм. Хэрэв энгийн арилжааны самбартай харьцахаас төвөгшөөж байвал, Trade цэс дэх, Convert буюу хөрвүүлэгч хэрэгслийг ашиглаж болно.

Хөрвүүлэгч хэрэгсэл нь, 1 крипто валютийг нөгөөгөөр эсвэл мөнгөн тэмдэгтээр сольж авах боломжыг олгодог, хамгийн хялбар арга бөгөөд, хамгийн эхний From буюу өгөх талбарт солиулах хөрөнгийн төрлийг сонгож, харгалзах дүнгийн хамтаар оруулаад, түүний дараах To буюу авах талбарт, сольж авах хөрөнгийн төрлийг сонгоод Preview Conversion буюу урьдчилан хянах цонхонд шилжих товчийг дарна. Доорх жишээ зурагт, 20 BUSD-ыг BTC-оор солих захиалга оруулж байгаа явцыг харуулав.

Үндсэн тохируулгаар, Market буюу шууд (зах зээлийн үнэлгээгээр) солилцохоор заагдсан байдгыг анхаараарай. Хэрэв, урьдчилан хянах цонхонд харагдах дүн сэтгэлд тань нийцэж байвал, захиалгаа оруулаад, солилцоогоо шууд, тухайн агшин дахь ханшаар гүйцэтгэж болно. Хэрэв солилцооны ханшийг өөрийнхөөрөө тохируулахыг хүсэж байвал, Limit буюу нөхцөлт солилцоог сонгож орсны дараа, дээрх зааврын дагуу хөрөнгийн төрлүүд болон хэмжээг зааж өгөх ёстой шүү. Гэхдээ нөхцөлт солилцооны үед, тухайн хөрөнгийн ханш, Таны заасан ханштай тэнцэх хүртэл солилцоо хийгдэхгүй, хүлээгдэнэ гэдгийг анхаарах хэрэгтэй.

Доорх жишээ зурагт, 1 BTC-ы ханшийг, 60'000 BUSD хүрсэн үед л солилцоог хийхээр тохируулсан байгаагийн дээр, хэрэв уг захиалга биелэгдэхгүй 1-ээс илүү өдөр хүлээгдвэл цуцлагдахаар заажээ. Энэ төрлийн захиалгыг оруулахын тулд, нөхцөлт захиалга гэж юу болох, хэрхэн ажилладаг, яаж тохируулж оруулах талаар зохих мэдлэгийг олж авсан байвал зохистой байдаг.

Сонгодог болон Ахисан түвшний арилжааны самбаруудыг хэрэглэх заавар

Байнанс дээр, арилжааны Classic болон Advanced гэсэн 2 төрлийн хэрэглэгчийн харилцах загвар бий.

Тэдгээрийн аль алин дээр үндсэн үйлдлүүдийг гүйцэтгэх боломжтой ч, Advanced буюу ахисан түвшний загвар нь илүү өндөр хүчин чадалтай байдаг. Түүнчлэн загваруудын харагдах байдлыг хэрэглэгч хүссэнээрээ өөрчлөн тохируулж болдог.

1. Арилжаа хийхээр сонгосон хослолтой тань холбоотой, сүүлийн 24 цагийн хугацаан дахь үзүүлэлтүүдийг энд харуулна.

2. Арилжааны хослолд харгалзах 2 хөрөнгийн ханшийн харьцааг зураглан харуулах лаан графыг дэлгэцийн зүүн хагасын төвд байрлуулсан байдаг.

3. Захиалгатай холбоотой мэдээллүүдийг харуулах самбарууд.

4. Захиалгын жагсаалт. Авах болон зарах захиалгуудыг ангилсан байгаа бөгөөд, тэдгээрийн дунд томоор, биелэгдсэн хамгийн сүүлийн захиалгын ханшийг харуулжээ.

5. Биелэгдсэн захиалгуудын жагсаалт

6. Spot буюу энгийн арилжааны хийхэд ашиглах самбар. Түүний хажууд, Margin буюу хөшүүрэгтэй арилжааны сонголтыг харуулсан байгаа ба, түүн дээр дарж арилжааны төрлийг солих, хөшүүргийн хэмжээг өөрчлөх боломжтой байдаг. Гэхдээ, хөшүүрэгт арилжаа нь тун өндөр эрсдэлтэй тул, шинэ хэрэглэгчдэд зохимжгүй. Мөн энэ самбар дотроос, захиалгын төрлийг сольж, тохируулж болдог.

7. Хөрөнгийн хэмжээгээ харж, хянах, хэтэвч хооронд шилжүүлэх боломжыг эндээс олж авч болно.

Хүчирхэг нууц үг зохиож ашиглах, ойр ойрхон шинэчлэх

ТОМ үсэг, жижиг үсэг, тоо болно тусгай тэмдэгтүүдийг агуулсан 8+ оронтой байх шаардлагатай. Нууц үг зохиож хэрэглэхтэй холбоотой, 2 цуврал нийтлэлийг маань уншихыг хүсвэл дараах холбоосуудад хандаарай.

2 шатлалт баталгаажуулалт буюу 2FA идэвхжүүлж, хэрэглэх

Дан 1 нууц үгэнд хөрөнгөө даатгах нь хангалттай бус учир, заавал 2FA идэвхжүүлж, хэрэглэж хэвших хэрэгтэй. Ямар учиртай, хэрхэн ажилладаг, яаж хэрэглэхийг ЭНД товшоод, харгалзах нийтлэлээс нь уншаарай.

Фишингээс хамгаалах кодыг тохируулж хэрэглэх

Фишинг гэж юу болох, яаж үйлдэгддэгийг ЭНД-ээс уншаарай.

Байнансаас ирж буй албан ёсны ц-шуудангуудыг, луйврын хуулбар шуудангаас ялгахад туслах ийм кодыг хэрэглэгч өөрөө зохиож, ашиглана. Тоо болон үсэг ашиглаад, дурын байдлаар тохируулж болох хэдий ч, бүх нийтэд ил тод мэдээллийг оруулахаас татгалзах хэрэгтэй.